प्रचण्डले जयपुरीको कान फुट्नेगरी भने-‘कस्ता भेडा हुन् ! लडेको लड्यै छन्, मरेको मर्यै छन्’

जनयुद्धलाई कुनै पनि बेला विसर्जन गर्ने निचोडमा पुगेका तत्कालीन माओवादी अध्यक्ष प्रचण्डलाई भेट्न ०६१ तिर सहिद  विवेककी पत्नी एवं माओवादी महिला नेतृ जयपुरी घर्ति भारत पुगेकी थिइन् । माओवादी हेडक्वाटर जनयुद्धकालभरी पूरै समय भारतमै रह्यो । प्रचण्ड पूरै समय उतै बसे । भर्खर आफ्नो जीवनसाथी कविराम केसी (विवेक) २०६० मंसीर २७ गते रोल्पाको पाछाबाङमा तत्कालीन शाही सेनासँगको भीडन्तमा सहिद भएका थिए ।

आफ्नो जीवन साथी गुुमेको पीडालगायत पार्टीका कयौं कुरा सेयर गर्नु थियो पार्टी अध्यक्ष प्रचण्डलाई जयपुरीले । भारतमा उनी लामो समय पार गरेर गइन् । भारतस्थित प्रचण्ड बसेको सेल्टरमा जयपुरी पुगेकी मात्र थिइन् । प्रचण्ड र अर्का माओवादीका कोही नेता आपसमा कुराकानी गरिरहेका थिए । जयपुरी अर्को कोठामा थिइन् । तर उनले प्रचण्डले कुरा गरेको अलि मधुरो आवाजमा सुनिरहेकी थिएन् ।

कुरा गर्दै जादा प्रचण्डले नेपालमा जारी जनयुद्धमा माओवादी जनसेनाहरुको प्रसँग कोट्याइरहेका थिए । जनसेना जसले जीवनमरणको लडाइँ लडिरहेको कुरा प्रचण्डलाई ज्ञात भएकै कुरा हो । प्रचण्डले जनयुद्धमा लड्ने लडाकु योद्धाहरुको सही ढंगले प्रंशसा गर्लान् भन्ने सबै नेता र कार्यकर्तालाई लाग्नु स्वभाविक हो । जयपुरीले पनि त्यही आशा बोकेर प्रचण्डलाई भेट्न पुगेकी थिइन् ।

कुराकानी गर्दै जादा प्रचण्डले जनयुद्धमा जीवन गुमाउने योद्धाहरुको साख गिर्ने गरी यति तीतो कुरा गरे कि त्यो जयपुरीको आफ्नै कानले सुन्यो । पालो कुरेर बसिरहेकी जयपुरीले कतिबेला प्रचण्डलाई भेटौला र आफ्ना पीडाहरु राखौला भन्ने मनसायका साथ पर्खेर बसेकी थिइन । प्रचण्डले कुरा गर्दै जादा अर्का एकजना नेतासँग रुकुम खाराको पहिलो लडाइँको प्रसँग कोट्याइरहेका थिए । जुन कार्वाही असफल भएको थियो ।

पहिलो खारा लडाइँमा जनमुक्ति सेनाका झन्डै पचासको हारहारीमा सहिद बनेका थिए । सय भन्दा बढी घाइते भएका थिए । खारामा लड्दा जनसेनाका ती योद्धाहरु, जो तत्कालीन शाही सेनाका क्याम्पमा आफ्नो जीवनलाई माया मारेर बम बनेर पड्किन पुग्थे । मर्ने भन्ने पीर थिएन कुनै पनि जनसेनाका सदस्यहरुलाई ।

ती बहादुर जनसेनाका योद्धाहरुलाई होच्याउने गरी प्रचण्डले बन्द कोठामा भने, ‘होइन हाम्रा सेनाहरु कस्ता भेडा हुन्, लडेको लड्यै छन्, मरेको मर्‍यै छन् ।’ प्रचण्डको यो बोली सुनेर जयपुरीको कान फुट्लाजस्तै भयो । भर्खरै आफ्नो जीवनसाथी विवेक सहिद भएको । त्यही पीडा सुनाउन भारत गएकी जयपुरीलाई प्रचण्डको यस्तो भनाइले उनलाई असाध्यै ठूलो पीडा दियो ।

प्रचण्डको कुराले आफ्नो पीडामाथि पीडा थपिइपछि जयपुरी प्रचण्डलाई कुनै कुरा नराखी नेपाल फर्केकी थिइन् । त्यसपछि उनले प्रचण्डलाई भित्रैदेखि नेता मान्न छोडेको आफ्ना सहकर्मीहरुसँग बताउने गरेकी थिइन् ।

स्रोत : जनपाटी